Ali Baba Karakaş – 03 Ocak 2026
Îhtîyacîya mi bi to û nefese to est a.
Pê bice destanê mi çimanê mi de bimane
Îhtîyacîya mi bi germinîya zerrîya to est a
Destê mi vewre ver veşenê, bice zereyê destanê xo.
Ez zemananê bê to ver bêzar bîya
Ne doman bîya ez ne xo ciwan (xort) zana
Emrê mi şî, qedîya mi hesbîyayene nêzana
Timûtim teyna, mabênê çar dîwaran de hepsî menda
Her çar mewsîman de zerrîya mi de vewre varena
Çimê mi camî ra, mi tim nîyada rîyo ke huyeno ra
Vejîye bê ke ez kî huyayene to ra bimusî
Bê leyê cemalê mi hona ke mi perde nêanto.
Mi akerd deftera zerrîya xo tede ti nusîyaye ya
Leyê ci de qelbêdo kewî ameyo ronayene
Mi fam nêkerd gelo na yew çibenok a?
Bê waştîya mi hona ke mi xo nêwerdo û nêqedênayo
Bê destanê mi pê bice, ez to de kewî bibî
Hezaran çîçegan de cuye (heyat) bibî
Ti keyeyê mi be, ez dîrega ey
Bê ke ez vejîyayîşê tîje bivînî