Ali Baba Karakaş – 03 Ocak 2026
Çimê to tayê çîyan vanê
Megê çimanê xo çimanê mi ra
Ax Gula mi reyê vinde bîna xo bigê
Ez usûl-usûl qayît bikerî çimanê to ra.
Çimê to, emşo estareyê tewr bereqîyayî çime to yê
Harmeyanê xo derg bike, destê to lîmanê minê emnîyetin
o.
Çimê to derya yo, pistinê to guvertaya min a.
Mi zerrîya xo de hepis bike, tede bimanî xo rê.
Destê mi emşo sey qaqlîbazanê telaşinan ê.
Nêeşkîyayî bifirê, niştê porê to ra winî mendê.
Ez çimanê to hepsî bibî, wa mewsimî ravîyarê.
Kam zano çend kitabî ca bîyê çimanê to de.
Kam zano çend şîîrî nusîyenê çimanê to yê estareyinan rê
Çi bi keyf êno wendene romanê çimanê to
Gama ke wext demdîya şanî ser, ancîyenê şîmşêrî
Asmên barîqet nano ro, estareyan dê.
Ez to ne şewan ne kî rojan de
To tena zerrîya xo de ca kena
Rîpelanê teqwîman cira mekerê
Saetî vinderê, qaydê wextî newe ra bêro girewtene.
Manîyê ke ma rê nusîyayê pers bikerê derwêşan ra
Tuwalê resaman ra xêz bîyo gelo eşqê ma?
Awa serdina kamcîn koyî
şaynayîşê şewatî yê hesreta zerrîya mi rê bes a?