Ali Baba Karakaş – 14 Şubat 2026
Ez bêveng xo ancena leyê to ra
Wexto ke mi rê abirnîyayo qedîya?
Ameyena mi ra haya kesî bîye ke
Şîyayena mi kes bizano ey heyat!
Rut ameya ez û xulam şona
Wextê mi nêmend ke ez xo top kerî
Telaşê çinayî girewto nê şîyayîşî
Ne sewdaya ke ez biresî, ne lîmano ke ez xo bidî bextî
Çimê to rayîr ancenê ruhê mi esîr
Penceraya mi şîkîyayî ya zê zerrîya mi
To tamîr kerdene rehet o pencera!
Ma zerrîya mi, kese est a ke tamîr bikero?
Teber huşka ezeb a, ruhê mi de zimostano xedar
Şima mexapîyê çimanê mine huyayîşinan ra
A ke bermena, şikîyena û rişîyena zerrîya min a
Keso ke qîrrayîşê ruhê mi heşna nêvejîya
Heskerdiş ney şewat gina ro zerrîya mi
Zerrîyî bêveng ê û kerr ê qîrrayîşê mi rê
Ziwan lal o yan zerrîyî?
Çîyo ke zereyê mi ra ancîyeno ti ya, ma çi mend mi ra?
Kam ame û şî kemerê eşte ci, se ke zerrîye birro bêbin o
Kam ke şî xêz kerd se ke dîwarê hucre yo
Herinda ke mi fam bikero, barê xo verda
Ez bîya xulamê na dinyaya bêweyaye…