Ali Baba Karakaş – 03 Ocak 2026
Ez seba ke to xo vîr ra bikerî şîya hewnan ra.
To hewnî kî mi dest ra girewtî, ez nêeşkaya rakewî
Odaya mi hucre ya, ez kî esîrê to bîya
Goşê mi de fîq-fîqê to çingenê.
Ti ke bihuyayêne tîje vejîyayêne
Tawo ke huyayêne çimê to buxin bîyêne
O wext çemî pêro pîya xuşxuşîyayêne
To bi yew nîyadayîşê xo zerrîya mi de mumê tafîştêne.
Roj vejîyayêne, mi bi to vejîyayîşê roje ra hes kerdbî.
Şewê neminî, sewdayê estareyan bi şewe bî
Yaqamozê ginayêne serê dengizî ro
Mi qayîtê estareyanê çimanê to kerdêne û xo xo de
şîyêne.
Seke ez bîyêne a aşme ke ginayêne sêneyê to ro
Ez çiqas to fikirîyena ruhê mi hende gineno şewatan ro
Terîfê heskerdişê to rê, herfê alfabe bes nîyê
Ti hende şewat a bêterîf a ke zerrîya mi de
Zerrîya mi sey a tenûr a ke ti tede nan pewjena
Sey kilam a ke ziwanê to de ya, to rê hesreta mi
Ti dewij a, ez şiwane ya.
Ti melodîyê bilûra min a zerrîya mi de.