Ali Baba Karakaş – 11 Şubat 2026
Hîna ke roj nêvejîya mê
Eke bêwext biginê aqilê mi ro xatirayî
Ver bi omidî rayê şonê çimî
Tarî nişêno ro zerrîya mi ro
Xatirayî benê girêyî qirika mi de
Zeman tekamul beno
Yan emro ke qedîyeno
Xatirayê ke mi de mende, kelemce yê zerrîye de
Yew dilopa şilîye rê ke binê welê de menda
Zîl dano toxim wisarî rê bena omid
Estareyî vejîyenê asmênê zerrîye de
Gineno lewan ro o nameyo ke zerrîye de şewat o.
Dormeyê ruhî gene hezar û yew persî
Nusîyenê rêzê sewda kila hare ginena zerrîye ro
Ê xatirayê ke mi mi ra gene erzenê dîyarê dejan
Xatirayî benê bar, benê îsyanî vera çinbîyena to
Nameyê to mi de wedarde yo, huyayîşê to teselî
Çimê to kewenê aqilê mi huzn nişeno ro ruhê mi ser
Kewena vayan ver zerrîya mi, kaş bena dîyar bi dîyar
Ez kewta tefûdumanê cîyayîye ver, cemedîyena ez
Ti dinyaya siran de wedarde menda?
Yan ez hewnanê xorînan de ya
Çinbîyena to ver zerrîye esîr kewena destê huznî
Ez rayîrê to rê hemrayîr, zerrîya to rê hes