Ali Baba Karakaş – 14 Şubat 2026
Çi zaf çîyî musnayî mi tenayîye
Dejo ke gineno zerrî rê zê hengmênî hîs kerdêne
Pîştena kula xorîn û xedarine
Tawo ke cemedîya virara fîştena bi hêvîyan
Wextê bermaneyene de pakkerdena hesiran
Çi tersî zêdîyay çi tersî zerrîye de
Ti qet virare fişte tersane xo ra?
Tawo ke tersaya reyna virare fîşte ci ra?
Şewanê bêhewnan de qet virarer fîşte xeyalan ra?
Zê vera bêvengîye sereberzkerde fîtike kuwaye?
Çîyê ke to mi ra girewtî û berdî
Ez nêzana ke kotî de ameyî pêser ey heyat
Mi kerd ke ez dost biba tenayîye rê
Hetêdê mi sila hetê min o bîn tenayîye
Çi aşmî çi mewsimî ez terkkerda
Çi kederî peyda bîyî na zerrîye de
Hêvîye mi şikîyayî ke şikîyayî
To balişnaya tale ra vat şewa to weşe bo?
To sifre de şerab pirr kerd qedeha diyine?
Meperse a diyine helbet ke mi tenayîya xo rê pirr kerde.