Ali Baba Karakaş – 03 Ocak 2026
Quleya Kêneke to zerrîya mi de birîne akerde
Birîna ke nêbena weşe, hesreta ke nêqedîyena
Ez hesreta to ver kewta rayîran
Mi ti persa şiwaneyî ra, va çin a.
Karwanê çerçîyan yew perse mi est o şima ra
Koyanê ke şima ci ra derbaz bîyê û newala ke şima
mesken girewta de
Cinîya ke ez ci ra hes kena gêrêna, ke a tîja koyan a.
Cinîya xoverdayoxe ya bajaran a.
Koyê Pozanti asê û çetin o, merdim nêeşkeno tede rayîr
şoro
Nika kotî ya ti, ez ca bi ca kes bi kes to persena û gêrena
Meşke şanena cinîya yoruke, piştîya pita xo est a.
Nê koyî mesken girewtê yorukan.
Koyan serê hesretanê nê cayan girewto.
Mi nêeşkaya ke to ra vajî ke to ra hes kena
Ma qedexeyê dîyarê qedexeyî bîy.
Hes kerdene û heskerdişê xo vatene
Seba ke ke zeval nêro dewaya to ya qedexeye rê.
Seba ke wa kes nêvîno qedexekerdeyî yê ma
Bikewo binê erdî wa şoro toreyê na dinya
Ez tim qaytkerdişê (ewnîyayîşê) to yê qedexeyî ra menda.
Mi va qey asmênî ra estare şeqetîya
Nêvana ke şeqetîyaya zereyê mi
Nameyê to qedexe, mi nameyê to Estare na pa
Eke ez vajî ke to ra hes kena, qedexe wedarîyeno ortê ra.