Ali Baba Karakaş – 14 Şubat 2026
Eke mi pers kena çimanê xo ra pers bike
Ez çimanê to yê ke mi çin hesibnenê de menda
Seba ke ti mi bivîne çend şewan de menda ez
Şewanê puk û xezebinan de çelmisîyaya rayîrê to de
Ti cinîya zerrîya mi hesreta min a
Rîyê to yo huyayîşin tek hesreta mi bîye
Ey waştîye eke zorê to şoro vera tersan
A game tefûduman bena seranser zerrîye
Ez kewena vaye vewre, tefûdumanî ver
Heskerdiş lazim o pê zerrîya ke zereyê to de ya
Kîlitê berê zerrîye ti be
Ziwan gineno lewan, lewî ginenê zerrîye rê.
Her çi qusur ke gêrena zerrîya xo ra biperse
Zerrîya xo ra pers bike çime to se xapîyayê
Mi zerrîya to ra teber yew welan nas nêkerd
Roştî nas nêkena bê çimanê to.
Perperik bî û binîşi mabênê her di bûrîyanê to ra
Nîyadayîşê to de pêde-pêde şorî çimanê to ra
Nefesê to yê germ û xeraritinî de germin bî ez
Mi bige zereyê nefesê xo ez zewqê to bî.
Mi tewrê huyayîşanê xo bike ez bibî fîq-fîqa to
Tewrê çimanê xo yê xumaminan bike ke ez bibî estareyê to
Berê zerrîya xo ake ke ez bibî sewdaya to
Ti bibe wisarê mi ke ez bibî şilîya to ey waştîyê.