Ali Baba Karakaş – 03 Ocak 2026
Vila kena ez matemê şewe
Wexto ke to fikirîyena, kewena xeyalan mîyan ke tede ti
est a.
Mi girewte kafa xo şewa ke tede ti est a.
Asmênî ra estareyanê tewr beriqîyayan ra to gêraya.
Şewlê aşme ginayo şewa mi ro, leşa mi rut a
Tenê mi tenê to de, çimê mi çimanê to de hepsî bîyê
Sey awa axmebîyaye, biherikîye zerrîya mi waştîye
Sey toximo ke beno kewî, bena kewe zerrîya mi de
Hesad bikerî, zerrîya mi bibo cûwen
Şewe ganî (gereke) bigino virana to ro
Ganî hetanî şefeqî biramê pêyaaştbîyayîşî
Sey kila adirê şiwaneyî yê gurrî yê lewê to
Waştiş o lewê to, ziwanê to de şehwet.
Tenê to de germ a temmuze
Pê wisarê zerrîya xo bipêşe leşa mi
Tafîyaya sey mumî ez çimanê to de.