Ali Baba Karakaş – 11 Şubat 2026
Ez qefelîya dê vinde bîna xo bigîrî
Bîya hemal, mi piştî kerdî hende barî
Bîya çoparêkedox, nêqedîya nîyame peynî
Mi awe ro nuşt wa laser wurzo pêrune bero
Ne dosto ke merdim xo biozno ro ci, ne zerrîye
To ra di persê mi est ê zerrîye
Mi peyê to ra çend mewsimî derbaz kerdî
Ti qîraya ez vengê to rê bîya rayîr
Huşka şewe kewte para mi rê
Şewê bêhewnî, huşka şefaqî
Ti qîraya, ez bê pers rayîr ra şîya
Dê vinde ez xo rê nefes bigîrî Îzmîr
Kemeraltı to de mend awiro tewr verên
Kuleya Saete şîîre nuşte û bermaye
Boranî bîyî sîper hesiranê şaîrî rê
Resamî portreyê şaîrî viraşt tuwalî ra
Nêginayî awirê to vejîyayîşê rojî ro
Mi qalind pîşt tutinê cixara Îzmîrî ra
Dumanê ci huzn boye dano, hesiranê mi de bî têmîya
Bajarê minê sewda, Îzmîr boye dana cixara
Na senî par a, edaletê to çin o?
Îzmîrê mi to de sewda û hesîrê çimanê mi mendî
Îskeleya Konakî ya vapuran lal mebe
Yew cinîya rinde vîyarte verê to ra.
Zerrîya mi eşte verê tefûdumanî vîyarte
Huzno bêwext pare bîya to to rê
Hesreta to zerrîya mi de, ziwanê mi lal
Şefeq de hesrete, wextê xow ra şîyena tîje hesreta min