TI KOTÎ YA ÇIMSÎYAYA MI?

Hal û xatir perskerdoxa mi, çimsîyaya mi, ti kotî ya?
Tarîyê şanî da penceraya mi ro
Estareyî reqis kenê asmênî ra
Serranser tarî ya odaya mi û ez bê to ya.

Hesretî verdîyayî orteyê tarîyî ro
Mecalê mi nêmendo ke ez arê bidî
Sey miloçikan vila bîyî hesretî odaya mi ra
Hesretî ginayî zerrîya mi ro, hesirî ameyî çiman ra

Meberme zerrîya mi, ti dejan ver xeneqîyena
Çiman ra nêrê hesirî, hesretêda bîne zêdîyena
Ez bê to menda, dîyarê xerîbîstanî de
Ancîyayo ro çarmixî zerrîya mi çinbîyayîşê to de.

Zerrîya mi de rengê keweyî raguzîyenê
Xebere vila bikerê teyr û turan û miloçikan rê
Înanê ke heşnayo ê pers kerê, pênêhesîyayan ra
Çimanê minê zerrîye ra estareyî vejîyayê.

Şefeq erzîya zerrîya mi de, boya wisarî êna
Kulmêde heskerdiş bigê lepa xo û bê ke eşq peyda bo
To de mende zerrîya mi, çimsîyaya mi
Elî Baba ya ez, helmê mi ti ya çimsîyaya mi.