Ali Baba Karakaş – 11 Şubat 2026
Leşa mi to de esîre mende ey xurbet
Zerrîya mi multecî mende to de
Welatê mi, xatirayê mi mendî.
Mi raverde ez azad bimanî
Rayê şorî ver bi hesretanê pêserbîyayan
Dewa mi, domanîya mi û sîya mi mende
Ruhê mi sêwî yo leşa mi ra cîya
No çendin o, sey talan o surgin.
Nika ez kotî ra vajî welatê mi?
Bêwelat menda, mapus de ya!
Şilîya ke varena sey mazgalî can dejnena.
Şewî tersonek ê zê multecîyan!
Şefeqê xo vîndî kerdo dîyarê surginî yo xurbet
Bedenê mi to de mend ey surgin
Nê bajarî rengê xo yê keweyî vîndî kerdo
Xurbet de her ca sîya boye bîyo
Hesretê mi to de mendî ey welat
Huyayîşo ke mi xo vîr ra kerdo biruşne sewdaya mi
Bi comerdîye estareyan bike zereyê zerfe
Xo vîr ra meke a qayîtkerdena lajekê masumî
Adresa ci dîyarê surginî, pul heskerdene bo
Boya welatî bo çar hetê ci de
A cinîya cînganeye ke reqsê serewedarayîşî kena
O kurdo ke sere şefaqî de bi tîlîlî govende kay keno.
Horonê Behrê Sîyayî, Zeybek Egeyî ra
Welat to de xatirayê mi mendî
Fabrîka de karker, hêgayî de erxat, barîqat de xoverdayox
Mi bêrîya a cinîya xoverdayoxe ke azadîye xoratêpîşta kerda