Ali Baba Karakaş – 03 Ocak 2026
Eke ez do biveşî, çimanê to yê huyayeyan de
Eke ez do biçelmisî, tenê to yê xasî de
Wisar honik o, ez hetê to yê çepî de kewe bî
Bizote bî ez lewanê to yê germinan de
Ez welê to bî, ti bizotê mi be!
Ez çimanê to de şilîya wisarî bî
Ez a vîndîbîyayî çimanê to de bivînî
Êlule to ana mi vîrî, ruhê mi de peyda kena dejî
Ti ke koyê Pozantî de ci ra boya anûxî êna
Piştîya xo de heqîbe, şîlanan arê dana
Ziwanê to de kilamêda hesrete
Êno goşanê mi rê vengê bilûre
Nalînê lornayîşê kilamanê eşqî ênê koyê Pozantiyî de
Çemî bîy ziwa rîyê adirê gurrî yê eşqî ra
Heqîbeyê xo ra neqişê motîfê yorukan
Ti ya cinîya azad û asî yê koyan.
Eşto xo piştî tifingê xo, mîya xo de guleyî
Cinîya egîd û xoverdayoxe yê koyan
Ti ya estareyê hesreta mi, adirê gurrê zerrîya mi
Rayîrê minê vîndîbîyayî pêro vejîne to cinîya mi