Serrî sey mureyanê tîzbeyî,
Rêze bi rêze rêz bîy layî ra û têhetî de…
Yew bi yew û dore bi dore
Rişîyayî zerrîya mi ro dayê.
Serrî bê to çi dejî dayî mi, dayê
Ge-ge bêderman û bêçare dayê…
Ge-ge kî rêzî benê şuşeyî, ê şuşeyî ke
verdîyenê ro bizoteyî ser, cis vejîyeno zerrîyan de…
A zerrîya mi kî henî bi o qayde
Bizoteyî ver bîya kozireya pîle
Sey kile veşeno her hetê mi,
Ez bê awe û bê to menda dayê.
Evîndar a ez dayê,
Heskerdiş û germîya bêterîfe mîyan de ya ez dayê
Binê şilîya barî-barîye de
Wele boya maye dana dayê.
Dayê to bizanayêne hesretê mi to rê
Û mi çiqas bêrîya boya to kerda…
Mi çi bêrîya germinîya to kerda dayê….
Dayê ez to rê mird nêbîya…
Nêeşkîya virana to de rakuyî
Nêeşkîya porê to mîştî bidî
Ez asayîş de nêbîya bê to dayê.
Dayê ewro mi rê zaf serd o, ez zaf cemedîyena dayê
Û tena ya bê to nê dîyarê xerîbîye de…
Ez sey yew xezal a ke tersayo
rîyê nêçîrvanê xo ra dayê
Sey yew perperiko ke nişto dara selwîye ra
Sey yew mîlçikê tersonekî ya
Bê to ya ez û sey nêçîro ke pabeyê nêçîrvanê xo ya dayê.