EŞQ ÇEPGIRO RADÎQAL O 

Emşo ez zaf qefilîyaye ya
Odaya mi serdin a û ez cemidîyena.
Peyê to ra sêwî mende zerrrîya mi
Zerrîye rincan kewte eşqî dima 

Kederî rêz bîy hetê minê çepî de.
Hetê mino çep serewedaritiş o
Çepgiro radîqal o barîqetê eşqî de 
To ra nêvajê terorîst û mepanê to ra.

Hetê mino çep, ti koyan ra hes kenî
Dereyanê ke azadane herikîyenê ra awe şimenî.
Pê vengê bilura şiwaneyî derdin benî
Pê vengê curaya derwêşî bermayenî.

Xem şima nêgîro çimê mi
Çi zaf veşaya ez şewatan de 
İfadeyê mi gênê ey zerrîye!
Wertê çar dêsan de

Mîyanê xirban de ya zerrîya mi
Sozê to est bî mi rê kanê ez û to bîyêne ma
Nika ti kotî ya, agêre bê
Bipêşe birîna ke to zerrîya mi de akerda.

Nêbo meyxaneyî benê keyeyê mi
Hema ke rojnameyan bi puntoyanê qalindan nênuşto.
Vanê ke Elî Baba kewto meyxaneyan 
Agêre bê ma, hema ke êlule nêvejîyaya