VAYÊ KAMCÎN KOYÎ

Mi to rayber zana ey zerrîye
Mi pers nêkerd qesêyê to vera
Mi xo da qîrrayîşanê to ver, nê dîyarê yabanî de
Nê tip û tarî de to zê roştî zana

Çi firtineyî vîyarnayî mi la tîk menda vera
Vileyê çewt nêkerd verê namerdi de
Mi ti zê cewherê vatena xo zana
Canê mi bi canê to, heskerdene bo zerrîye de

Sewda ver zerrîye de şewat o, nifte çimê to
Şewe rûtûrepa, bi roje qayîtkerdişê to
Hêgayê xaşxaşikê kutikan zê hewrê verê tîje yo
Hema a gama ke mi ti dîya veşa zerrîya mi to rê

Mi xo eşt rayîran va xêx o.
Xo pey de verdan rayîranê çetinan
Seba ke biresî to emrê xo eşt awe
Bîya şaîr ke to binusî ey zerrîye.

Kîlit dîyayo zerrîya to ro
Şîfreyê ci zerrîya to de yo yake kîlitê zerrîya xo
Hesîrî murekabê qeleme yê
Mi vayî kerdî kaxite, tede şîîrî nuştî

Mi nameyê to pers kerd cinîya asîya koyan
Heqîbeyê xo sûr, kufeya xo de sewda
Çend û çend çîçeqî çilmisîyayî a qayîtkerdena to ya rindeke ra
Cinîya mina rindeke vaje, ti vayê kamcîn koyî ya

Kotî ya nika ti, şew a yan roj a?
Sewdaya yemane ya kamcîn çemî ya
Xaşxaşikanê kutikan ra nuştî mi şîîrê xo
Ez zaf bêrîya to kena, cesaret û hêvîya mi pirodayîye.