Ali Baba Karakaş – 14 Şubat 2026
Hewa serd o yan zerrîya mi rê serd o?
Şilîya bê to bîyene asena çimane mi ra.
Pîrkeçelî kay kenê xeyalî ruhê mi de;
Xatirayê sewda nalenê zereyê mi de
Kuçeyo ke ma tede kay kerdêne isiz o;
Huznê dara henaran est a, meywe nêdana.
Teşrîna verêne boxça xo daya xatirwaştena peyêne
vera-vera zêdîyenê huznê ke to verdayê xo ra dima
Zerrîyî est ê bermenê û vejîyenê rayîr seba keşfan
bê to çend teşrînê verênê bînî ey yarê?
Hewr nişte zereyê çimanê mi— estareya mi kotî ya?
Gola ke ma pîya name daybî ci ma pawena.
Qeraxê gole de yew çut qulindî sema gênê;
perra xo danê ro awe, usûl bi usûl perre şanenê.
Yê mi perra mi çin a ke xo rê kesî rê bişanî;
va bîle bê to vindeno, xo xo de şono
Vengê tenayîye de lerzeno nameyê to;
a suzî ya ke va doşan rê verdano.
Zê awe hêrikîyenê, êyê ke zereyê mi ra derbaz benê;
bê qeraxî maneno qiseyê mi, kor beno rêça xo.
Bê—hona ke nêçilmisîyaya kekvila ke to zerrîya mi de naya ro,
hona ke ma zê dara henaran bêmeyweyan nêmendê.
Teşrîna verêne cayê xo wisarî rê biverdo çimanê to de
agêre—estareya mi, wa bireso şodirî şewa mi.