Ali Baba Karakaş – 14 Şubat 2026
Mi bigê berê Gimgim,
Berê awanê serdinan ê Gimgimî.
Raverde wa şo rê huznê mi xorînan;
mi bêrîya koyanê Gimgimî, boya kengeran kerda.
Mi hende bêrîya ci kerda ke boya gewenan pirnika mi verde ya.
mi bêrîya kemera mezela maya kerda
Keyeyo ke ez tede maya xo ra bîya,
a şemûga ke ci ra rêçê domanîya mi menda bêrîya kerda.
Bêrîya ê koyan ke ez tede zê estoran vaz dayêne,
çemanê xo xu-xuşan, rojanê xo yê şiwanêyîye kerda.
Mi bêrîya dewa xo kerda,
Mi bêrîya Civarka kerda.
Mi berê bêrê Civarka;
xerîbîye canî veşnena, poynena zereyî.
Ez bîya esîr verê dêsanê xurbetîye de,
dîyarê surginî zaf dejneno zerrîya mi.
Çi zaf dejneno mi şima bizanayêne no dîyarê surginî;
Kelemçe da ziwanê mi ro
Vat “Eke ez zazakî qisey bikerê, vanê welat beno lete,
Beyraqe êna war, vengê ezanî qut beno.”
Vat “Eke ez zazakî qisey bikerî, vanê Kurdîya êna pê
hesîyayene,
Vanê hukimdar pê beno nerehet”
Wayîrê hukmanê qehpeyan şima bizanê ke:
şima kelemce pirodê rê ziwan û kulturê mi kî
ruhê mi azad o, ruhê ê koyanê asîyan o.
Rayîrê mektebî de warway ê domanî,
wertê deftere xo de danê we ziwanê xo yê dayîke;
Nîyadayena mamostayî zê çêberê asinênî yo
Kilîte dano her çekuya “lo” û “dayê” ro.
Werzeno texteyî ver yew lajêko şermok,
Bi tirkîya şeşe gebexneno nameyê xo;
Pey ra fîk-fîqe, ver ra felaka êna,
Zê “Reyna qisey meke!” vengê şîrqayena çogane.
A roje yew zerrîya qije visîyena Civarka ra,
Bêveng keweno rayîr ver bi awanê Gimgimî.
Serrî vîyarenê, o lajêk beno pîl surgin de;
Her ziwanî museno kî pê ziwanê maya xo bermeno talde de.
Mi bigê berê ê vengî, ê koyan;
Wa rîyê mi bigino awa Gimgimî ro,
Wa bizanê: Eke ez agêrî rojê
Çekuya ke zincire bişikno reyna zazakî bo.
Mi berê Gimgim,
Mi berê dewa mi Civarka;
uca de şiwanîye keno hona domano ke zerreyê mi der o,
uca de serbest o ziwanê mi, asmên serbest,
uca de tu hukimdar nêeşkeno qarişê ruhê mi bo.